ექიმი გიორგი ღოღობერიძე გადაცემაში “როგორ გადავრჩი” საუბრობს, როგორ მოვაგვაროთ ოფლიანობა მარტივად და ეფექტურად და რა უნდა გავითვალისწინოთ ანტიპერსპირანტების გამოყენებისას:
– ოფლიანობა ფიზიოლოგიური რეაქციაა. როცა ადამიანს სცხელა, სითბოს მოშორების ერთ-ერთი გზა, საოფლე ჯირკვლებიდან ოფლის გამოყოფაა. გამოყოფილ ოფლს, როგორც კი ჩვენს კანზე აღმოჩნდება, ბაქტერიები ამუშავებს და სუნი ჩნდება. ადამიანები პრობლემასთან საბრძოლველად, როგორც წესი, ორ გზას მიმართავენ – იყენებენ დეოდორანტებს, რომლებიც ოფლდენას ხელს არ უშლიან, მაგრამ ოფლს სუნი აღარ ექნება. მეორე საშუალებები ანტიპერსპირანტებია, რომლებიც ოფლიანობას ებრძვიან, ოფლი აღარ გამოიყოფა, შესაბამისად, არც სუნი შეგაწუხებთ. ჩვენს კანში ორი სახის საოფლე ჯირკვალი არსებობს – ეკრანული და აპოკრინული. ანტიპერსპირანტებით ეკრინული საოფლე ჯირკვლები იხშობა. ანტიპერსპირანტებში არის ასეთი ნივთიერება, რომელსაც ალუმინის ქლორიდი ეწოდება. ის საოფლე ჯირკვლების სადინრებს ახშობს და ოფლდენა მცირდება. თუმცა, დახშობა ალუმინის ქლორიდის სხვადასხვა კონცენტრაციითაა შესაძლებელი. როდესაც აფთიაქში შედიხართ და ანტიპერსპირანტებს აარჩევთ, დააკვირდით, მასში ალუმინის ქლორიდის კონცენტრაცია როგორია. ზოგიერთი მათგანი 5%-ს შეიცავს, ზოგი, 10%, ზოგიც 30%-ს. რაც უფრო მაღალი მაჩვენებელია, საშუალება უფრო ძლიერია და კვირის განმავლობაში მისი გამოყენება უფრო ნაკლებად ხდება აუცილებელი. თუ ალუმინის ქლორიდის დაბალი შემცველობაა, მისი გამოყენება დღეში ერთხელ გიწევთ, თუ მაღალი შემცველობაა, 3 დღეში ერთხელ, ან კიდევ კვირაში ერთხელ მოგიწევთ. ამიტომ, ამ საკითხს ყურადღება მიაქციეთ. როდესაც ანტიპერსპირანტს იყიდით, დააკვირდით, ალუმინის ქლორიდის შემცველობის რა პროცენტი აწერია.
რაც შეეხება ოფლიანობის გამომწვევ მიზეზებს, თუ მხოლოდ ოფლიანობაა და სხვა რაიმე ნიშანი არ გაქვთ, როგორც წესი, ის დაავადებას არ უკავშირდება და ჰორმონალური ცვლით აიხსნება. მაგრამ, თუ პაციენტს სხვა ნიშნებიც აქვს, ეს შეიძლება დაავადების მანიშნებელი იყოს. მაგალითად, თუ ადამიანი პარალელურად წონაშიც იკლებს, ეს შეიძლება სიმსივნეების ნიშანიც იყოს. ან კიდევ, თუ პარალელურად ჭარბწონიანი, შესაძლოა, შაქრიანი დიაბეტის ნიშანი იყოს. მოკლედ რომ ვთქვათ, თუ ოფლიანობის გარდა, სხვა ჩივილი არ გაქვთ, ეს დაავადებებს არ უკავშირდება. მაგრამ, თუ სხვა ჩივილებიც გაქვთ, ყურადღება უნდა მიაქციოთ. ოფლიანობას ზოგიერთი მედიკამენტიც იწვევს. მაგალითად, ანტიდეპრესანტები, არასტეროიდები, შაქრიანი დიაბეტის სამკურნალოდ დანიშნული მედიკამენტები და სხვა.
როგორ გამოვიყენოთ სწორად?
ანტიპერსპირანტების დილით გამოყენება უაზრობაა, ღამით უნდა გამოიყენოთ. ეს ნივთიერებები მაშინაა ეფექტური, თუ ისინი საოფლე ჯირკვლების სადინრებამდე მიაღწევენ. თუ დილით გამოიყენებთ, ამ დროს საოფლე ჯირკვლების სადინრები უკვე ოფლითაა გადავსებული და ანტიპერსპირანტების ეფექტურობა მცირდება. როგორც კი ღამით იბანავებთ, ტანი ძალიან კარგად გაიმშრალეთ. იღლიების მიდამო სველი არ უნდა იყოს. თუ იღლიების მიდამო სველი იქნება, ამ შემთხვევაში, ანტიპერსპირანტს რომ მიისხურებთ, წყალში გაიხსნება, სადინრებამდე ეფექტური კონცენტრაციით ვერც კი მიაღწევს და რამდენიმე საათში ეფექტურობას კარგავს. ამიტომ, საღამოს, ძილის წინ, დაბანის შემდეგ კარგად გაიმშრალეთ კანი და ამის შემდეგ გამოიყენეთ.
გარდა ამისა, თუ იღლია ახალი გაპარსული გაქვთ, ეცადეთ, რომ არ გამოიყენოთ. გაპარსვიდან 24 საათის შემდეგაა ანტიპერსპირანტების გამოყენება რეკომენდებული. ახალ გაპარსულზე მეტალის ქლორიდი თავისთავად კანში ჩაჯდება და ამან შესაძლოა, გაღიზიანება გამოიწვიოს.
როდესაც ანტიპერსპირანტს გამოიყენებთ, შეეცადეთ, რომ ტანსაცმელი მჭიდროდ არ ჩაიცვათ. აცადეთ, რომ გაშრეს.
რაც შეეხება დატანას, დატანა იღლიიდან 15 სანტიმეტრის მოშორებით, 2 წამის განმავლობაში უნდა მოხდეს. იღლია კარგად უნდა დაფაროთ.
