“მე ეს ძალიან მეტკინა. ჩვენ, შვილმკვდარი მშობლები, ვინც გადავრჩით, ვინც ვერ შევძელით თავის მოკვლა..” – ემოციური განცხადება

“მე ეს ძალიან მეტკინა. ჩვენ, შვილმკვდარი მშობლები, ვინც გადავრჩით, ვინც ვერ შევძელით თავის მოკვლა..” – ემოციური განცხადება

10 წლის წინ 17 წლის ბერი, ანდრია მძიმე სენით გარდაიცვალა. მისი დედა, თინათინ ჩხვიმიანი, რომელიც ბერი ანდრიას სახელობის ფონდს უდგას სათავეში და პატარა ონკოპაციენტების მკურნალობასა და შემდგომ რეაბილიტაციაზე ზრუნავს, ჟურნალ „სარკესთან“ ცნობილი ტელეწამყვანის, ნიკოლოზ წულუკიძის ოჯახში დატრიალებულ ტრაგედიას ეხმიანება:

„მიყვარს ნიკოლოზი, არაჩვეულებრივი ადამიანია. ის არა მარტო მე, მთელ საქართველოს უყვარს. მართალია, ახლა ვერ წაიკითხავს ამ ყველაფერს, რაც იწერება, მაგრამ დადგება დრო, ამ პოსტებს გაეცნობა და რით ვანუგეშებთ, რომ ღმერთი არ არის?

მე ეს ძალიან მეტკინა. ჩვენ, შვილმკვდარი მშობლები, ვინც გადავრჩით, ვინც ვერ შევძელით თავის მოკვლა, ვერ ჩავიდინეთ ეს ცოდვა, ვინც დავდივართ, ვარსებობთ, ნუგეში ვიპოვეთ ღმერთში, რწმენაში, იმაში, რომ ჩვენი შვილი კი არ მოკვდა, გარდაიცვალა, ამაღლდა ცად, უფლის გვერდით დაიმკვიდრა ადგილი, რომ ჩვენ მას აუცილებლად შევხვდებით, რომ ჩვენი სულიერი კავშირი არ გაწყვეტილა. ამ დროს როცა გვეუბნებიან, ღმერთი არ არისო, რაზე მიგვანიშნებენ?!

იმიტომ დავწერე პოსტში, რომ ღმერთი არის, სამოთხეც, ჩემი შვილიც და ის ანგელოზებიც სამოთხეში არიან. ნუგეში არსებობს და რომც არ არსებობდეს, ადამიანებო, თქვენ უნდა მოგვცეთ ეს ნუგეში, რადგან სამწუხაროდ, უბედურებები ხდება, მშობლები კარგავენ შვილს და ამ შვილდაკარგული მშობლებისთვის ნუგეში სხვა ადამიანები და უზენაესი ღმერთია…“

Leave a Comment

თქვენი ელფოსტის მისამართი გამოქვეყნებული არ იყო.