ტრამპმა განაცხადა, რომ ეპიკური მრისხანება 4 კვირაზე მეტს ხანს არ გასტანს, თუმცა როგორი იქნება ეს ერთი თვე, ამის პროგნოზირება არავის შეუძლია. ისრაელმა უკვე გამოაცხადა საგანგებო მდგომარეობა. მთავარი საერთაშორისო აეროპორტი ” ბენ გურიონი” დაკეტილია. პერიოდულად, ისმის თავშესაფრებში ჩასვლის მოწოდება. ირანის ბალისტიკურმა რაკეტებმა ისრაელში უკვე რამდენიმე ადამიანი იმსხვერპლა. ვაშინგტონისა და თელ-ავივის მკაცრი გაფრთხილების მიუხედავად, გუშინ ომში ჩაერთო “ჰეზბოლა”, რის გამოც ახლა ისრაელი უკვე ორ ფრონტზე იბრძვის და აცხადებს, რომ, სანამ ლიბანის მხრიდან საფრთხე სრულად არ განეიტრალდება, “ცაჰალი” არ გაჩერდება.
თუმცა, ისრაელზე მეტად, ახლა ამერიკის მოკავშირე არაბული სამყარო უფრო ზიანდება. თუ არ ჩავთვლით რამდენიმე ინციდენტს წარსულში, ეს პირველი შემთხვევაა, როდესაც ირანი მის გარშემო არაბულ ქვეყნებს ბალისტიკური რაკეტებით ერთდროულად ბომბავს. ესენია: საუდის არაბეთი – რეგიონის ეკონომიკის მამოძრავებელი ძალა და ნავთობის მთავარი ექსპორტიორი, კატარი – თხევადი გაზის უმსხვილესი დონორი, ქუვეითი, საამიროები, ბაჰრეინი, იორდანია. ახლა ირანული რაკეტები საფრთხეს ამ ქვეყნებს უფრო უქმნის, ვიდრე ისრაელს, რომელიც მსგავს დარტყმებს შეჩვეულია და მსოფლიოში ნომერ პირველი თავდაცვის სისტემა რკინის გუმბათიც იცავს.
“დაახლოებით 1 საათის წინ ისრაელში, მთლიანი ქვეყნის მასშტაბით, სარაკეტო თავდასხმა განხორციელდა ირანის მხრიდან. ერთი საათის წინ ჩვენ ამოვედით თავშესაფრიდან. ბოლო შემთხვევაში, 10-ზე მეტი ბალისტიკური რაკეტა იქნა გამოშვებული ირანიდან ისრაელის წინააღმდეგ. რაკეტების დიდი ნაწილი იორდანიაში ჩამოვარდა. სამმა ბალისტიკურმა რაკეტამ მოახერხა ისრაელის საჰაერო სივრცის გადმოკვეთა, თუმცა რკინის გუმბათმა ყველა რაკეტა ჰაერშივე გაანადგურა, მხოლოდ ქალაქ პეტახტიკლაში, თელ-ავივთან ძალიან ახლოს ნამსხვრევები ჩამოვარდა და ქალაქის ერთ-ერთ შენობას დაეცა – მსხვერპლი და დაზიანებები, ამ შემთხვევაში, მოსახლეობაში არ ყოფილა.
დღის პირველ ნახევარში ირანიდან სარაკეტო თავდასხმა ასევე განხორციელდა ისრაელის სამხრეთ ნაწილში. ასევე, ქალაქ ბერშევაში დაფიქსირდა პირდაპირი ვარდნა, თუმცა იქაც მსხვერპლი არ მოჰყოლია, მხოლოდ რამდენიმე ადამიანი დაზარალდა.
დღეს ირანული წყაროები და არაბული პროპაგანდისტული მედიები ავრცელებდნენ ინფორმაციას, რომ ირანელი სამხედროების და რაკეტების სამიზნე იყო ბენიამინ ნეთანიაჰუ და ისრაელის მაღალი თანამდებობის პირები. მთელი დღის განმავლობაში, ნეთანიაჰუ არ აკეთებდა კომენტარს, თუმცა დღეს, დაახლოებით 3 საათის წინ, ნეთანიაჰუ მოსადის მაღალჩინოსანთან ერთად მივიდა იერუსალიმთან ახლოს მდებარე ქალაქში, სადაც გუშინ ირანულ რაკეტებს 9 ადამიანი ემსხვერპლა.
ბენიამინ ნეთანიაჰუმ გააკეთა განცხადება მოსადის მაღალჩინოსანთან ერთად, რომ ისრაელი არ უშინდება ირანულ მუქარებს და, მოკავშირეებთან ერთად, ყველაფერს აკეთებს, რომ ირანში რეჟიმში მთლიანად ჩამოიშალოს.
დღესვე, ისრაელის თავდაცვის მინისტრმა – ისრაელ კაცმა გააკეთა განცხადება, რომ თუ ისრაელს მოუწევს, ისრაელი მზად არის ცეცხლი გახსნას რამდენიმე ფრონტზეც. მინისტრმა ასევე განაცხადა, რომ ისრაელი მზად არის, უკიდურეს შემთხვევაში, დაიწყოს სამხედრო სახმელეთო ოპერაცია, თუ ამის საჭიროება გახდება, უკვე ლიბანში”, – განაცხადა “კურიერის” კორესპონდენტმა თელ-ავივიდან, მიხეილ ხეცოიძემ.
