საბერძნეთში უამინდობა გრძელდება.მედიის ცნობით, დღეს რისკების შეფასების კომიტეტმა საგანგებო შეკრება მოაწყო. პროგნოზის მიხედვით, ხვალ ქვეყნის მრავალ რეგიონში მოსალოდნელია ძლიერი წვიმა, შტორმი და ქარიშხალი. ინფორმაციას Georgians. gr ავრცელებს.
სამოქალაქო დაცვის გენერალური მდივნის, ნიკოს პაპაევსტათიუს მიერ მოწვეული კომიტეტის მეცნიერთა დასკვნით:
ა) ძლიერი წვიმები მოსალოდნელია თითქმის მთელ ქვეყანაში. მოვლენები განსაკუთრებით ინტენსიური იქნება თავდაპირველად დასავლეთ საბერძნეთში, შემდეგ კი ცენტრალურ საბერძნეთში, აღმოსავლეთ მაკედონიაში, თრაკიში, კიკლადებზე (ძირითადად აღმოსავლეთ და სამხრეთ ნაწილში), კრეტაზე, აღმოსავლეთ ეგეოსის კუნძულებსა და დოდეკანესზე.ბ) ათენი: ხვალ დილიდან სინოპტიკოსები პროგნოზირებენ წვიმას და შტორმს. გ) იონიის ზღვაში, აღმოსავლეთ ეგეოსსა და დოდეკანესის კუნძულებზე ქარის სიმძლავრე 8-დან 9 ბალს მიაღწევს.ოპერაციების მართვის ეროვნული ცენტრი უკვე დაუკავშირდა ადგილობრივ მუნიციპალიტეტებსა და ყველა შესაბამის უწყებას, რათა ისინი სრულ მზადყოფნაში შეხვდნენ მოსალოდნელ სტიქიას.
