მსახიობი მაია დობორჯგინიძე დღევანდელ აქცია-მსვლელობას შეუერთდა. როგორც მან მედიასთან საუბრისას განაცხადა, დღეს ხელისუფლებამ პოლიციური რეჟიმი დაამყარა, რაც მისი მოსაზრებით, საშიშია.
მისი თქმით, არ სურს, მისმა შვილებმა დიქტატურის ქვეშ იცხოვრონ, ამიტომ სწორედ ამისთვის ქუჩაში იბრძვის:
„ჩემთვის, ფაქტობრივად, პოლიციური რეჟიმი დაამყარეს, რისიც ყველაზე ძალიან მეშინოდა. უკან დაბრუნება საბჭოთა კავშირში, CCCR ერქვა მაშინ. მე ვებრძვი ამას, რომ ჩემმა შვილებმა ერთპიროვნული მმართველობის, დიქტატურის ქვეშ არ იცხოვრონ, არამედ იცხოვრონ ისეთ ქვეყანაში, სადაც ადამიანის უფლებები არის პირველი.
მთავარია ჩვენ ვიყოთ ძალიან შემართებით და მგონია, რომ ყველაზე ბედნიერი გამარჯვება იქნება, თვითონ მთავრობა მიხვდეს, რომ რაღაც დათმობებზე კი არა, ძალიან დიდ დათმობებზე უნდა წავიდეს იმიტომ, რომ ასე ცხოვრება…
რაღაც ერთმანეთს დავერიეთ, რაც ჩემთვის ყველაზე მტკივნეულია, როდემდე? ეს მდგომარეობა ძალიან საშიშია. ხომ გაიმარჯვეს? ჰოდა, ჩაატარონ ხელახალი არჩევნები, რომელსაც უცხოელები დააკვირდებიან, თუ კიდევ გაიმარჯვებენ, მერე უკვე ჩვენ გადავწყვეტთ, დავრჩეთ ამ ქვეყანაში თუ წავიდეთ“. – უთხრა მედიას მსახიობმა.
