საქალაქო სასამართლომ “მთავარი არხის” წამყვანი და ჟურნალისტი, ლაშა ნაკაიძე მის მიმართ წაყენებულ ყველაზე მძიმე ბრალდებებში გაამართლა – ოთხი მუხლიდან ორი მოხსნილია.
ლაშა ნაკაიძეს არ დაუდასტურდა არც მეგობარი გოგონას გაუპატიურება და არც მისი პირადი ცხოვრების საიდუმლოს გავრცელება.
ჟურნალისტი სასამართლომ სიტყვიერ ძალადობასა და მუქარაში დამნაშავედ ცნო და ერთი წლით თავისუფლების აღკვეთა მიუსაჯა.
9 თვეა ნაკაიძე წინასწარ პატიმრობაში იმყოფება და საპატიმროს ის 3 თვეში დატოვებს.
საქართველოს პროკურატურამ გენდერის ნიშნით შეუწყნარებლობის მოტივით გაუპატიურების და სიცოცხლის მოსპობის მუქარის ფაქტებზე, „მთავარი არხის“ დილის გადაცემის წამყვანს, ლაშა ნაკაიძეს ბრალდება გასული წლის აგვისტოში წარუდგინა.
„მთავარი არხის” წამყვანი, ლაშა ნაკაიძე დანაშაულს თავიდანვე არ აღიარებდა.
ლაშა ნაკაიძის ადვოკატი, ლალი ბიბილეიშვილი „პრაიმტაიმთან“ ამბობს, რომ დაკავებულს ყველაზე მძიმე მუხლები მოეხსნა და მას მხოლოდ „სიტყვიერი ძალადობისა და მუქარის“ გამო მოსამართლემ 1 წლით თავისუფლების აღკვეთა მიუსაჯა, საიდანაც 9 თვე უკვე საპატიმრში აქვს გატარებული და ლაშა ნაკაიძე საპატიმროს აგვისტოში დატოვებს.
„ძალიან ბედნიერი ვარ და ლაშაც ასევე ძალიან ბედნიერია, რომ სასამართლომ სამართლიანი განაჩენი გამოიტანა. მას შეფარდებული მუხლებით 10-დან 15 წლამდე პატიმრობა ემუქრებოდა. 3 თვეში ლაშა საპატიმროს დატოვებს“ – თქვა ლალი ბიბილეიშვილმა „პრაიმტაიმთან“ საუბრისას.
წყარო : Primetime.ge
