უსთავი-ლილოს გზაზე მომხდარ უმძიმეს ავარიას სამი ადამიანის სიცოცხლე ემსხვერპლა. როგორც ამბობენ, მსუბუქი ავტომობილის მძღოლი გასწრებას ცდილობდა რა დროსაც ტრაილერს შეეჯახა. ადგილზე დაიღუპა სამი ადამიანი.
- დაღუპულებს შორის არიან მანქანის მძღოლი, სამი შვილის მამა 35 წლის ზაურ ალიევი და 78 წლის ლოლა ბუთხუზი.
ამ ავარიის დროს ასევე დაშავდა მანქანაში მყოფი კიდევ ორი მგზავრი. მათ შორის გარდაცვლილი მძღოლის ძმა, 37 წლის რაიმონ ალიევი და კიდევ ერთი პირი. როგორც ცნობილი ხდება, ამ ავარიის დროს დაზიანდა კიდევ ერთი ავტომობილი, თუმცა იმ მანქანაში მყოფები საბედნიეროდ გადარჩნენ.
ამ დრომდე უმძიმეს მდგომარეობაში რჩება გარდაცვლილი მძღოლის ძმა, რომელიც რეანიმაციაში იმყოფება. ისიც სამი შვილის მამაა. ფაქტზე გამოძიება დაწყებულია. ავარიის მიზეზებს სამართალდამცავები არკვევენ.
როგორც ჩვენთან ცნობილი ხდება, მანქანაში მყოფი პირები ლილოს ბაზრობაზე მუშაობდნენ და ყველანი ერთად რუსთავიდან სამსახურში მიდიოდნენ, სწორედ ამ დროს მოხდა ეს ავარია. ყველა გარდაცვლილი რუსთავის მაცხოვრებელია. ლილო მოლში დაგვიდასტურეს, რომ გარდაცვლილები მათთან მუშაობდნენ და რომ ისინი მათი მეწარმეები იყვნენ.
“ცუდი ამინდი იყო, არ ვიცი რა იყო ამ ავარიის მიზეზი, მაგრამ მართლა საშინელი სანახავი იყო. ის მანქანა რომ ვნახე არ ვიცი იქ როგორ გადარჩა ის ორი ადამიანიც. სულ დაჭყლეტილი იყო მანქანა. ირგვლივ მიმოფანტული იყო მანქანის ნაწილები, მე რომ მივედი, ფაქტი უკვე მომხდარი იყო. ახლოს არ მიგვიშვა პოლიციამ. როგორც ჩანდა, მსუბუქი მანქანის მძღოლი ტრაილერზე გასწრებას ცდილობდა და ამ დროს არის შეჯახება მომხდარი. იმ გზაზე სისულელეა გასწრება, რადგან ბევრი ტრაილერი მოძრაობს და დიდი სიჩქარით მოძრაობას მაინც ვერ შეძლებ ადამიანი. თან გზაც დაზიანებულია და ვიწროც არის. სატრანზიტო გზაა. სამწუხაროა 3 ადამიანის დაღუპვა. შესაძლოა წვიმაში მანქანაც მოუსრიალდა, არ ვიცი მიზეზი რა იყო” – ამბობს ფაქტის თვითმხილველი.
გარდაცვლილის ერთ ერთი ახლობელი ადასტურებს, რომ ზაურ ალიევი, ძმასთან და თანამშრომლებთან ერთად დილით რუსთავიდან ლილოში სამუშაოდ მიდიოდა და რომ სწორედ ამ დროს დატრიალდა ეს ტრაგედია.
“ძალიან მძიმე ტრაგედია მოხდა. დაღუპულები რუსთავში ცხოვრობდნენ, გარდაცვლილია 35 წლის ზაურ ალიევი, არაჩვეულებრივი ადამიანი. მშრომელი, საკუთარი ბიზნესი ჰქონდათ ძმებს ლილოში. საკუთარი ადგილი და იქ მუშაობდნენ, ორივე ძმები მშრომელები და კარგი ბიჭები არიან. ზაურ და რაიმონ ალიევები. ისინი ერთად მიდიოდნენ დღეს დილით სამსახურში და ამ დროს დატრიალდა ეს ტრაგედია. ძალიან დაგვამწუხრა ამ ამბავმა, როგორც შევიტყვე, მეორე ძმა რაიმონი რეანიმაციაშია და ექიმები მის გადარჩენას ცდილობენ. როგორ ვერ ვიჯერებ ზაურის გარდაცვალებას. როგორც გავიგეთ, სულ ხუთი ადამიანი იჯდა იმ მანქანაში, ეტყობა სხვებიც მიჰყავდათ სამსახურში. ლილოს გზაზე დატრიალდა ტრაგედია. კადრებში ჩანს, რომ ზაურის მანქანაა. როგორც ვიცით, მათ მანქანაში მყოფი კიდევ ორი ქალბატონია გარდაცვლილი. ეს თავზარდამცემი ამბავი ცოტა ხნის წინ გავიგეთ და ძალიან მიჭირს იმის გააზრება, რომ ზაური აღარ გვყავს. ორივე ძმები დაოჯახებულები არიან. ორივეს სამ სამი შვილი ჰყავთ, პატარები. ძალიან განვიცდი მომხდარს და სამძიმარს ვუცხადებ გარდაცვლილების ოჯახის წევრებს” – ამბობს ჩვენთან საუბარში ახლობელი.
შინაგან საქმეთა სამინისტროში ამბობენ, რომ მომხდართან დაკავშირებით გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.
წყარო : Ambebi.ge
