პროკურატურამ ტრანსპორტის მოძრაობის უსაფრთხოების წესის დარღვევის ფაქტზე, რამაც ადამიანის სიცოცხლის მოსპობა გამოიწვია, ერთ პირს ბრალდება წარუდგინა.
გარდაბანში ავარა 27 იანვარს, ღამის საათებში მოხდა, რასაც 18 წლის გოგონას სიცოცხლე ემსხვერპლა. გარდაცვლილი ახალგაზრდა აიდა კურბანოვაა. უფლებადამცველ სამირა ბაირამოვას ცნობით, ბრალდებული მამედ მამედოვია და ის გარდაბნის მუნიციპალიტეტის მერიის თანამშრომელია.
“შინაგან საქმეთა სამინისტროს მიერ ჩატარებული გამოძიებით დადგენილია, რომ 27 იანვარს, გარდაბანში, ალკოჰოლის ზემოქმედების ქვეშ მყოფმა ბრალდებულმა, ავტომობილის მართვისას ვერ უზრუნველყო მოძრაობის უსაფრთხოების წესის დაცვა და ქვეითს შეეჯახა, რომელიც ადგილზე გარდაიცვალა.
სამართალდამცველებმა ბრალდებული იმავე დღეს დააკავეს.
დაკავებულს ბრალდება საქართველოს სისხლის სამართლის კოდექსის 276-ე მუხლის მე-7 ნაწილით (ავტომობილის მოძრაობის უსაფრთხოების წესის დარღვევა, რამაც ადამიანის სიცოცხლის მოსპობა გამოიწვია, ჩადენილი ალკოჰოლის ზემოქმედების ქვეშ) წარუდგინა, რაც სასჯელის სახედ და ზომად 6-დან 9 წლამდე თავისუფლების აღკვეთას ითვალისწინებს” – ნათქვამია უწყების მიერ გავრცელებულ ინფორმაციაში.
პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, სასამართლოს კანონით დადგენილ ვადაში მიმართავს.
