პიოტრ იანი მერაბ დვალიშვილის განცხადებებს გამოეხმაურა. UFC-ის სუპერ მსუბუქი წონითი დივიზიონის ახალმა ჩემპიონმა პრესკონფერენცია გამართა და ერთ-ერთი შეკითხვა „მანქანის“ მიერ ბოლო დღეებში გამოქვეყნებულ პოსტებზე დაუსვეს.
ჟურნალისტის შეკითხვა: „შენი განცხადების შემდეგ, რომელშიც აღნიშნე, რომ მერაბს შენ კი არა, შენი მენეჯერი, საიატი ესაუბრებოდა, დვალიშვილს ისეთი რეაქცია ჰქონდა, თითქოს ნაწყენი დარჩა. რა რეაქცია გქონდა მის სიტყვებზე?“
„საიატი ჩემი თანხმობის გარეშე სოციალურ ქსელში არაფერს აქვეყნებს. ფაქტობრივად, ერთობლივად ვთანხმდებით, რა და როგორ დავწეროთ, მაგრამ საიატი ყოველთვის ცდილობს, ეს ბევრად რბილ ტონში გააკეთოს. ძალიან ხშირად არის მომენტები, როდესაც ყველაფერს არ მითარგმნის, რათა შეურაცხყოფებზე ან ისტორიებზე ემოციური რეაქცია არ მქონდეს. ამის გამო მასთან ყოველთვის კონფლიქტი მაქვს და მინდა, თითოეული სიტყვა ვიცოდე, ვინ რა თქვა.
რაც შეეხება მერაბს — რას ელოდებოდა?! რა უნდოდა, რომ ჩხუბის შემდეგ მეგობრები გავმხდარიყავით? იმდენი საზიზღრობა აქვს ნათქვამი… არ ვიცი, რა უნდოდა.“
შეგახსენებთ, რომ საჩემპიონო ორთაბრძოლის შემდეგ იანსა და დვალიშვილს შორის X-ზე მეგობრული მიმოწერა გაიმართა, თუმცა ახლახან პიოტრმა აღიარა, რომ პირადად მას არაფერი დაუწერია და მერაბს იანის პროფილით მისი მენეჯერი ესაუბრებოდა. ამასთან დაკავშირებით „მანქანამ“ პოსტი გამოაქვეყნა და იანს მატყუარა უწოდა.
წყარო : Crystalsport.ge
