თურქეთში, სტამბოლში, გერმანელი ოჯახის ოთხივე წევრის მოწამვლის საქმეზე გამოძიების მიმართულება რადიკალურად შეიცვალა. სასამართლო-სამედიცინო ექსპერტიზის პირველადი დასკვნით, ბოჯეკების ოჯახი, სავარაუდოდ, ქუჩის საკვებით არ მოწამლულა – ტრაგედია სასტუმროში, ქიმიური ნივთიერების ზემოქმედების შედეგად დადგა.
გერმანიიდან სტამბოლში ერთი კვირით ჩასული ბოჯეკების ოთხსულიანი ოჯახი – მშობლები სერვეტი და ჩიგდემი და მათი მცირეწლოვანი შვილები, 6 წლის კადირი და 3 წლის მასალი – სასტუმროში ყოფნისას ერთმანეთის მიყოლებით დაიღუპნენ. თავდაპირველად, გამოძიება ძირითადად ქუჩის საკვების მოვაჭრეებზე იყო ფოკუსირებული.
გადამწყვეტი დასკვნა ექსპერტიზიდან
თურქული მედიის ინფორმაციით, სასამართლო-სამედიცინო ექსპერტიზის ინსტიტუტის მიერ მომზადებული პირველადი ანგარიში მკვეთრად ცვლის საქმის მსვლელობას.
ანგარიშში ნათქვამია, რომ “ოჯახის გარდაცვალების მიზეზი, დიდი ალბათობით, სასტუმროში ქიმიური ნივთიერების ზემოქმედებაა. საკვებით მოწამვლის ვერსია კი ნაკლებად დამაჯერებელია”.
ეს დასკვნა ადასტურებს მანამდე გამოთქმულ ვარაუდს, რომ ოჯახის გარდაცვალება უკავშირდებოდა დეზინფექციას, რომელიც სასტუმროში ინციდენტამდე ცოტა ხნით ადრე ჩატარდა. ექსპერტები ეჭვობდნენ, რომ შესაძლოა გამოყენებული ყოფილიყო ადამიანისთვის მავნე, ტოქსიკური პესტიციდები.
მიმდინარე გამოძიება
მიუხედავად იმისა, რომ ახალმა დასკვნამ საკვებით მოწამვლის ვერსია უკანა პლანზე გადაწია, აღნიშნულ საქმესთან დაკავშირებით მასშტაბური დაკავებები განხორციელდა.
პოლიციამ თავდაპირველად დააკავა 11 პირი, მათ შორის კაფეების მფლობელები, მიდიების, ქოქორეჩისა და ლოკუმის გამყიდველები.სასამართლოს გადაწყვეტილებით, ოთხ პირს პატიმრობა შეეფარდა.გარდა ბოჯეკების ოჯახისა, იმავე სასტუმროში მყოფმა კიდევ სამმა ტურისტმა (აიუბ ჰამრაუიმ, რედა ფახრიმ და კიდევ ერთმა აიუბ ჰამრაუიმ) იგრძნო შეუძლოდ და ისინი საავადმყოფოში გადაიყვანეს. უახლესი ინფორმაციით, მათ სიცოცხლეს საფრთხე არ ემუქრება და ისინი სამედიცინო მეთვალყურეობის ქვეშ რჩებიან.
გამოძიება ახლა, სავარაუდოდ, სრულად გადაერთვება სასტუმროში ჩატარებული ქიმიური დამუშავების დეტალებზე და დაადგენს, კონკრეტულად რა ნივთიერებამ გამოიწვია ოთხი ადამიანის სიცოცხლის მოსპობა.
წყარო : Ambebi.ge
