საზოგადოებისთვის საყვარელი მსახიობი, დონარა გვრიტიშვილი მძიმე სენს ებრძვის. მსახიობი, რომელმაც ხუთი წელი ამერიკაში გაატარა, სადაც სიმსივნე დაუდგინდა და უმკურნალეს, ორი თვის წინ სამშობლოში დაბრუნდა რეციდივით და ამჟამად, როგორც მისი ახლობლები ამბობენ, უმძიმეს მდგომარეობაშია.
- დონარა გვრიტიშვილის ერთადერთი სურვილია, ნახოს თავისი შვილი, გიორგი ხოსროშვილი, რომელიც უკვე ერთი წელია პატიმრობაშია. მისი მეორე შვილი, ხატია ხოსროშვილი, საჯარო მიმართვას ავრცელებს ყველა შესაბამისი უწყებისა და საზოგადოებისადმი და ითხოვს, რომ დედა-შვილს დამშვიდობების უფლება მიეცეთ
გიორგი ხოსროშვილი სასჯელს სრულად სულ რამდენიმე კვირაში, 5 ნოემბერს ასრულებს, თუმცა, როგორც ხატია წერს, “დედას დრო აღარ აქვს”.
- გთავაზობთ ხატია ხოსროშვილის მიმართვას უცვლელად:
“დღეს მინდა გთხოვოთ ყველას – მოქალაქეებს, მსახიობებს, ჟურნალისტებს, საჯარო პირებს და განსაკუთრებით იმ უწყებებს, ვისი კომპეტენციაცაა ადამიანის ელემენტარული სურვილის შესრულება – პატიმარს მისცეს უფლება, ბადრაგის თანხლებით ნახოს მომაკვდავი დედა.
ეს არ არის სენტიმენტებზე აგებული თხოვნა. ეს არის მიმართვა ადამიანობის სახელით.
ყველა კანონი, ინსტიტუცია და მექანიზმი ადამიანებისთვის და ადამიანების მიერაა შექმნილი – და თუ ყველაზე დიდი ღირებულება ადამიანობაა, მაშინ ახლა სწორედ ის წუთია, როცა ამ ღირებულების შემჩნევა და რეალიზება შეგვიძლია.
ბევრისათვის საყვარელი და ძვირფასი მსახიობი – დონარა გვრიტიშვილი უმძიმესი დიაგნოზით სიცოცხლის ბოლო დღეებს ითვლის. მისი ერთადერთი სურვილი და ძალა, რაც დღემდე აცოცხლებს, არის ბოლო შეხვედრა შვილთან – გიორგი ხოსროშვილთან, რომელიც უკვე მხოლოდ რამდენიმე კვირაში ასრულებს სასჯელს (5 ნოემბერს).
დონარას დრო აღარ აქვს – არც საათებით, არც დღეებით.
დაწერილია განცხადებები შესაბამის სტრუქტურებში, მაგრამ შეხვედრა ისევ სათუოა.
ეს შეხვედრა კი უბრალოდ “დამშვიდობება” არ არის – ეს არის ერთი დედისა და შვილის ადამიანური უფლება.
და ამ უფლების ადგილი კანონშიცაა და საზოგადოებაშიც.
მივმართავ სასჯელაღსრულების სამინისტროს, სასჯელაღსრულებისა და პრობაციის სამინისტრო გთხოვთ, გაითვალისწინოთ დონარა გვრიტიშვილის მდგომარეობა და მიიღოთ ადამიანური გადაწყვეტილება.
ვიწვევ საზოგადოებასაც, რომ ხმა მიაწვდინოთ გადაწყვეტილების მიმღებებს.
დონარა – ღირსეული ადამიანი და არტისტი – არ უნდა წავიდეს ამ სამყაროდან იმ ტკივილით, რომ ვერ ჩაიხუტა შვილი, რომელთან შეხვედრასაც ხუთი წელი ნატრობდა”, – წერს ხატია ხოსროშვილი.
წყარო : Ambebi.ge
