სოციალურ ქსელებში ვირუსულად ვრცელდება ცნობილი სულიერი მოძღვრის, მამა გაბრიელის (გაბრიელ ურგებაძე) სიტყვები, სადაც ის მორწმუნეებს ურჩევს, ყოველი საქმისა და განსაკუთრებით საკვების მიღების წინ ჯვრის გადასახვის ტრადიცია არ დაივიწყონ.
თუ გარემოება ასეთია, რომ ღიად ჯვრის გადასახვა არ შეგიძლიათ, მამა გაბრიელი მრევლს ურჩევდა, რომ გონებითა და თვალით მაინც გადასახონ ჯვარი და თქვან: „სახელითა მამისათა და ძისათა და სულისა წმინდისათა, ამინ“.
„ჯვარი ყველაფერს უნდა გადავსახოთ… ჯვარი ყოველი ბოროტების დამწველია. რადიაციაც კი ძალას კარგავს საკვებზე ჯვრის გადასახვის შემდეგ. მოწამლულიც რომ მოგაწოდოს ვინმემ, მისგანაც დაგიფარავს, მაგრამ თუ შენ წინასწარ იცი, რომ მოწამლულია, აუცილებელია ასეთისგან თავი შეიკავო, რომ უფლის გამოცდაში არ ჩაგეთვალოს და არ დაიღუპო. აუცილებელია ყოველ ნივთს, გვაწვდიან თუ ჩვენით ვიღებთ, ჯერ ჯვარი გადავსახოთ, შემდეგ კი ავიღოთ, განსაკუთრებით საჭმელ-სასმელს, რადგან ჯადოს მოქმედების უმეტესი მავნებლობაც ამ გზით ვრცელდება. ნუ მოგერიდებათ, რომ ყოველთვის და ყველაფერს ჯვარი გადასახოთ, სადაც არ უნდა იყოთ და ვისგანაც არ უნდა იღებდეთ რამეს. წმინდანს და მორწმუნეს ეს არასოდეს ეწყინება, რადგან ამაში შენს რწმენას დაინახავს. ურწმუნოს აზრი კი შენ არ უნდა გაინტერესებდეს. თუ მაინც ისეთ სიტუაციაში ხარ, რომ გერიდება ვინმესგან მოწოდებულს ხელით ჯერ ჯვარი გადასახო და შემდეგ გამოართვა, მაშინ თვალით და გონებით მაინც გადასახე ჯვარი, შემდეგი სიტყვებით: „სახელითა მამისათა და ძისათა და სულისა წმინდისათა, ამინ“.
