ცნობილი კრიმინალური ავტორიტეტის, ტარიელ ონიანის, მეტსახელად “ტაროს”, ვაჟის, უშბა-ბუბა ონიანის გრანდიოზულმა ქორწილმა მცხეთაში, “მარანი ჰოლში“, საზოგადოებისა და მედიის დიდი ყურადღება მიიპყრო. მასშტაბური ზეიმი 500-ზე მეტ სტუმარს ითვლიდა და ყველა დეტალით იყო გამორჩეული, დაწყებული ცნობილი სტუმრებით, დამთავრებული ემოციური მომენტებითა და ტრადიციული რიტუალებით.
უშბამ და მისმა მეუღლემ, რუსი წარმოშობის მაშამ (რომელიც ასევე ცნობილია როგორც მარიამი), ჯვარი სვეტიცხოვლის საკათედრო ტაძარში დაიწერეს. ჯვრისწერაზე უშბას ქართული ეროვნული სამოსი, ჩოხა, ეცვა, მაშას, დახურული თეთრი საქორწინო კაბა, რომელიც მოგვიანებით გამოიცვალა.
ქართველი მომღერლები და გავლენიანი სტუმრები
ქორწილის მუსიკალური ნაწილი ვარსკვლავური შემსრულებლებით იყო დატვირთული. სტუმრებს შესასვლელში ტრადიციული სიმღერებით „ქსოვრელები“ ხვდებოდნენ, ხოლო საღამოს განმავლობაში სცენაზე იმღერეს, ნინო ჩხეიძემ, ანსამბლმა შვიდკაცამ და ნინი ქარსელაძემ ქუჩის ბიჭებთან ერთად. ნინი ქორწილის სტუმარი გახლდათ, ის უშბას და მისი დის, გვანცას ახლო მეგობარია. ქორწილში იყვნენ ასევე, ნინის და, ანასტასია ხაჩიძე და მაკა ასათიანის ვაჟი ლევან ჟორდანია.
ქორწილში რუსეთიდან უამრავი სტუმარი ჩამოფრინდა. მათ შორის იყო მომღერალ ვალერი მელაძის შვილი სოფიკო მელაძე.
გუშინ მედიის ყურადღება უშბას ნათლიამ, ცნობილმა ქართველმა ბანმა და პოლიტიკოსმა პაატა ბურჭულაძემ მიიპყრო. მან სოციალურ ქსელში ქორწილის ფოტოები გამოაქვეყნა და ახალდაქორწინებულებს ბედნიერება უსურვა. წლების წინ, როდესაც ბურჭულაძეს პოლიტიკაში მოსვლის შემდეგ ტარიელ ონიანთან ნათესაობა გაუხსნეს, მან „პალიტრანიუსთან“ უშბას შესახებ ისაუბრა: „ტარიელ ონიანი პარიზში გავიცანი. მან მთხოვა, მომენათლა მისი შვილი უშბა. ეს 20 წლის წინ იყო, როდესაც მე პარიზში გასტროლებზე ვიყავი. რა თქმა უნდა, მე სიამოვნებით დავთანხმდი… მე ვამაყობ ჩემი მონათლულით. უშბა არის ერთ-ერთი საუკეთესო ფინანსისტი, რომელიც დღეს ლონდონშია“.
ტარიელ ონიანის არყოფნა: რატომ ვერ ესწრებოდა მამა შვილის ქორწილს?
მიუხედავად უშბას ემოციური გამოსვლისა, რომელშიც მან მამა ახსენა, ტარიელ ონიანი ქორწილს არ დასწრებია.
“200 კაციც დავიწყეთ და 500-ით დავამთავრეთ და მამაჩემიც გავაჩერე 500-ზე როგორც იქნა. მეტი არ ეტეოდა თორემ დიდი სიამოვნებით დავპატიჟებდი ყველას. გისურვებთ კარგ საღამოს, გაერთეთ“ – განაცხადა უშბა ონიანმა ქორწილში.
მისი არყოფნა მოსალოდნელი იყო სამართლებრივი სტატუსიდან გამომდინარე. 2019 წელს, როდესაც ის რუსეთის ციხიდან გაათავისუფლეს, მას სამუდამოდ აეკრძალა რუსეთში დაბრუნება. ამის შემდეგ, რუსეთმა ის ესპანეთს გადასცა, სადაც მას ფულის გათეთრების ბრალდებით ეძებდნენ. მას შემდეგ ტარიელ ონიანი მედიის ყურადღების ცენტრში აღარ გამოჩენილა. საჯარო ინფორმაციის თანახმად, ის ამჟამად სავარაუდოდ ესპანეთში ცხოვრობს.
ტარიელ ონიანის შვილები – ქალიშვილი გვანცა მარია და ვაჟი უშბა – ბავშვობა პარიზსა და ბარსელონაში გაატარეს. უშბამ განათლება ლონდონის ბრიტანულ საერთაშორისო სკოლაში მიიღო, შემდეგ კი კასის ბიზნეს სკოლა დაამთავრა. რუსული მედიის ინფორმაციით, უმცროსი ონიანი მამის ბიზნესებს მართავს და „საოჯახო ბიზნესის“ ლეგალიზაციისთვის ყველაფერს აკეთებს.
უშბას მეუღლე: მაშა (მარიამი)
უშბას მეუღლე, მაშა, რუსი წარმოშობისაა, მაგრამ განათლება საზღვარგარეთ აქვს მიღებული. ის ბევრს მოგზაურობს და აქტიურ ცხოვრებას ეწევა.
ნახეთ ფოტოები.
წყარო : Ambebi.ge
