მკლავჭიდელი ქალი, გამოკითხვაზე დღის პირველ საათზე მივიდა.”კურიერის” კითხვა, რა მიზეზით გაუსწორდა ფიზიკურად 14 წლის მოზარდს, ხატია ვიბლიანმა უპასუხოდ დატოვა. გამოკითხვაზე შესვლამდე თქვა, რომ მომხდარზე მოგვიანებით ვრცლად ისაუბრებს.
სამართალდამცველებმა ვიბლიანი გამოკითხვაზე მას შემდეგ დაიბარეს, რაც სოციალურ ქსელში მოზარდზე ძალადობის მძიმე კადრები გავრცელდა. პოსტის ავტორმა დაწერა, რომ ქალი, რომელიც არასრულწლოვანს ფიზიკურად უსწორდებოდა, ცნობილი სპორტსმენია და ჩემპიონია მკლავჭიდში.
სოციალურ ქსელში გავრცელებული კადრები საღამოს საათებშია გადაღებული. მასალაში კარგად ჩანს, რომ ქალი არასრულწლოვანს ხელებს ძირითადად სახის არეში ურტყამს. ჩანაწერის მიხედვით, მოზარდი თავის დაცვას და გაქცევას რამდენჯერმე შეეცადა, თუმცა უშედეგოდ. არ ისმის ხმა, მაგრამ კადრებში ჩანს, რომ ქალი მსხვერპლს სიტყვიერ შეურაცხყოფასაც აყენებს. იქვე დგას ახალგაზრდა მამაკაციც, რომელიც ჩხუბში არ ჩარეულა. მძიმე სურათს შეესწრო მცირეწლოვანი ბავშვიც, რომელიც სავარაუდოდ სპორტსმენის შვილია.
კადრები ვეფხისტყაოსნის ქუჩაზე დამონტაჟებულმა კამერამ გადაიღო. გავრცელებული ინფორმაციით, არასრულწლოვანზე ძალადობას წინ უსწრებდა ერთ-ერთ სუპერმარკეტში ხატია ვიბლიანსა და 14 წლის მოზარდს შორის სიტყვიერი დაპირისპირება.
“კურიერი” იმ მაღაზიაშიც მივიდა, სადაც კონფლიქტი დაიწყო. თანამშრომლებს მომხდარის დეტალებზე საუბარი არ სურთ, თუმცა ადასტურებენ, რომ სამართალდამცველებმა ისინი უკვე გამოკითხეს და ობიექტზე დამონტაჟებული კამერის ჩანაწერებიც ამოიღეს.
14 წლის მოზარდზე ძალადობის შესახებ ვეფხისტყაოსნის ქუჩაზე ყველამ იცის, მათ შორის, იმ სპორტდარბაზებშიც, სადაც მკლავჭიდელი ხატია ვიბლიანი ხშირად ვარჯიშობდა.
გავრცელებული ინფორმაციით, ხატია ვიბლიანი უახლოეს დღეებში ჩემპიონატზე საზღვარგარეთ უნდა წასულიყო. მკლავჭიდის აკადემიაში ადასტურებენ, რომ 31 წლის ქალი ასპარეზობისთვის ემზადებოდა და ვარჯიშობდა.
არასრულწლოვანზე ძალადობის ფაქტზე, შინაგან საქმეთა სამინისტრომ გამოძიება 126-ე მუხლით დაიწყო. საგამოძიებო მოქმედებები ამ დრომდე გრძელდება.
წყარო : Primetime.ge
