აშშ-ის პრეზიდენტი, დონალდ ტრამპი საზოგადოებას დაპირდა რომ უკრაინელი დევნილის, ირინა ზარუცკაიას მკვლელობის საქმეს თვალყურს მიადევნებს. “საშინელებაა. ვნახე ვიდეო. აუცილებლად გავეცნობი საქმეს,”- თქვა ტრამპმა. ამის შესახებ “ფოქს ნიუსი” იუწყება.
23 წლის უკრაინელი ქალი ჩრდილოეთ კაროლინაში, ქალაქ შარლოტის სწრაფმავალ ტრამვაიში, ორი დღის წინ, გვიან საღამოს მოკლეს. მას 34 წლის მამაკაცი, დეკარლოს ბრაუნ-უმცროსი დაესხა თავს და დანით რამდენიმე ჭრილობა მიაყენა. ვიდეომეთვალყურეობის კამერის მიერ დაფიქსირებული თავდასხმის კადრები სოციალურ ქსელებში გავრცელდა. კადრებში ჩანს რომ ზარუცკაია ტრანსპორტში შედის და მამაკაცის წინა სკამზე ჯდება. მამაკაცი მოულოდნელად დანას იღებს და ქალს რამდენჯერმე ურტყამს. ქალი ადგილზე გარდაიცვალა.
ამერიკული მედიის ცნობით, თავდამსხმელი მრავალჯერ იყო ნასამართლევი. ის პოლიციამ მომხდარიდან მალევე დააკავა. ინციდენტმა საზოგადოების მღელვარება გამოიწვია. მომხმარებლები სოცქსელებში წერენ რომ დამნაშავე არა მხოლოდ თავდამსხმელი, არამედ, მოსამართლეცაა, რომელმაც ბრალდებული მცირე ხნის წინ თავისუფლებაზე გამოუშვა.
მომხდარი ტრაგედიის შესახებ განცხადება გააკეთა ილონ მასკმაც. მან ტელეკომპანია “სიენენი” ფაქტის არასათანადოდ გაშუქებისთვის გააკრიტიკა.
წყარო : ახალი ამბები – Top News
