,,პორტუს“ ყოფილი კაპიტანი და პორტუგალიის ნაკრების ყოფილი მცველი ჟორჟე კოშტა 53 წლის ასაკში გულის შეტევით გარდაიცვალა. ამის შესახებ „პორტუს“ ოფიციალური ვებგვერდი იუწყება.
„ჟორჟე კოშტამ დაგვტოვა. ერთ-ერთი ჩვენთაგანი, ლიდერი, კაპიტანი, მისაბაძი მაგალითი. „პორტუს“ სიმბოლო. მადლობა, რომ ბოლომდე კლუბთან ერთად რჩებოდი“, – წერია კლუბის განცხადებაში.
ჟორჯე კოშტამ „პორტუს“ ბაზაზე პრესასთან გამოსვლის შემდეგ თავი შეუძლოდ იგრძნო და გონება დაკარგა. აღნიშნავენ, რომ მანამდე მან ძლიერი სიცხის გამო რამდენჯერმე დაიჩივლა. ყოფილი ფეხბურთელი მძიმე მდგომარეობაში საავადმყოფოში გადაიყვანეს, სადაც ინტენსიური თერაპიის განყოფილებაში გარდაიცვალა.
ცნობილია, რომ ჟორჟე კოშტამ 2022 წელსაც გადაიტანა გულის შეტევა.
ჟორჟე კოშტა „პორტუს“ აღზრდილი იყო და ამ გუნდში 1992-2005 წლებში თამაშობდა. მშობლიურ კლუბთან ერთად ის რვაჯერ გახდა პორტუგალიის ჩემპიონი, გარდა ამისა, მოიგო უეფას თასი (2002/03) და ჩემპიონთა ლიგა (2003/04).
