მუსიკოსი, ავტორ-შემსრულებელი მამუკა ჩარკვიანი ჯანმრთელობის გაუარესებული მდგომარეობის გამო, საავადმყოფოში იმყოფება.
მამუკა ჩარკვიანის ჯანმრთელობის მდგომარეობის შესახებ მისი და, თაკო ჩარკვიანი Ambebi.ge-სთან ინტერვიუში საუბრობს და ამბობს, რომ მას რეანიმაციულ განყოფილებაში მკურნალობენ.
„მამუკა არ არის კარგად, ვიბრძვით, ექიმებიც და ყველა, თავად უნდა მოგვეხმაროს ორგანიზმი. უკვე დიდი ხანია ამ მდგომარეობაშია. პალატაში გადავიყვანეთ და შემდეგ ისევ რეანიმაციაში დააბრუნეს. ძალიან კარგი გუნდია ექიმების, ყველაფერს აკეთებენ. ღმერთის იმედად ვართ და ექიმების…
[მდგომარეობა] ორი წლის წინ გართულდა, ფილტვის ემბოლია დაემართა. იქამდე რამდენჯერმე პნევმონიით მოხვდა კლინიკაში, კავკასიის მედიცინის ცენტრში იწვა, შემდეგ ლევან რატიანთან და გამოიყვანეს მდგომარეობიდან. ძალიან კარგად იმუშავა ყველამ. ახლა ისევ კავკასიის მედიცინის ცენტრში წევს, ამ გუნდმა კარგად იცის მისი მდგომარეობა. გადაყოლილები არიან“, – ამბობს თაკო ჩარკვიანი Ambebi.ge-სთან ინტერვიუში.
რამდენიმე დღის წინ, თაკო ჩარკვიანმა მამუკა ჩარკვიანთან დაკავშირებით სოციალურ ქსელში მიმართვაც გაავრცელა:
„ჩემო უმაგრესო მეგობრებო, ვისაც გიყვარვართ, ან მამუკა გიყვართ, გამოუგზავნეთ თქვენი ლოცვა და ენერგეტიკა ჩემს მამუკას, თქვენ გენაცვალეთ მე“, – დაწერა თაკო ჩარკვიანმა.
