14 ივნისს, გონიოში მომხდარმა ავტოსაგზაო შემთხვევამ საზოგადოება შეძრა – ბათუმიდან სარფის მიმართულებით მოძრავი მსუბუქი ავტომობილი გაჩერებულ სატვირთო ავტომობილს შეეჯახა, ადგილზე გარდაიცვალა სამი გოგო, დაშავდა ავტომობილში მყოფი კიდევ 2 ადამიანი.
დაღუპულები 25-წლამდე ასაკის გოგოები – მეგი ჯაიანი, ანა მახარაძე და სალომე გორგაძე არიან. ისინი სოფელ სამებიდან იყვნენ.
გარდაცვლილი მეგი ჯაიანის და, ნაზი ჯაიანი სოციალურ ქსელში ვიდეოს აქვეყნებს და დას ემოციური სტატუსით მიმართავს.
„ამ დრომდე არ მჯეროდა სასწაულების, მაგრამ შენ ჩემს და ჩვენს ცხოვრებაში ყველაფერი ააყირავე. ძალიან ბევრმა მომწერა, რომ ეს ჩიტი მთელი დღე სადარბაზოს არ მოსცილებია, დაკრძალვამდე და დაკრძალვის მერეც.
გუშინ რომ შემოფრინდი და ჩვენს ირგვლივ ტრიალებდი, ახლა დილის 9:31 წუთია და შენ ისევ აქ ხარ, ისევ ჩვენ გვერდით, არადა გუშინ მამიკომ კარები სპეციალურად ღია დაგიტოვა, გაფრინდესო, ცოდოა აქო, მაგრამ შენ ხომ ძალიან ჯიუტი იყავი და ხარ?
თვალს არ გაშორებდა მამიკო, თვალებში შეგციცინებდა, იქნებ რამე უნდა და მანიშნოსო, ჩემო სიცოცხლე.
ვერ გეტყვი და ვერ ავხსნი ჩემს გულში რა ხდება, ან აწი რა იქნება, ის ვიცი, რომ ამის შემდეგ ჩემს სიცილსაც, ღიმილსაც და ტირილსაც ერთი ფასი აქვს.
მამიკოს პირადი ანგელოზი, ჩვენზე თუ არა მამიკოზე მაინც როგორ არ იფიქრე?!
მეგიკუნა, ჯერ ხომ წინ ძალიან ბევრი რამ გვქონდა ერთად გასაკეთებელი?! სად გეჩქარებოდა?! გთხოვ, ხშირად მანიშნე, რომ სულ ჩემს გვერდით ხარ, გთხოვ, ხშირად მოდი ჩემთან სიზმრებში.
ვიცი, რომ სულ ჩემ გვერდით იქნები, როგორც ჩემი მფარველი ანგელოზი და დამიცავ მუდამ!
მიყვარხარ სამუდამოდ და უსაზღვროდ, ჩემო სიცოცხლე“, – წერს მეგი ჯაიანის და სოციალურ ქსელში.
