საქართველოს კინოაკადემია გიორგი გოგიბერიძის გარდაცვალების გამო სოციალურ ქსელში სამძიმრის წერილს აქვეყნებს.
„ქართულმა კინომ კიდევ ერთი, ძალიან დიდი და მტკივნეული დანაკლისი განიცადა… ხანგრძლივი ავადმყოფობის შემდეგ, 48 წლის ასაკში, წავიდა – გამორჩეული ნიჭით დაჯილდოებული, ძალიან კარგი და უკეთილშობილესი ადამიანი, ჩვენი გიორგი გოგიბერიძე…
საქართველოს კინოაკადემია ღრმა მწუხარებას გამოთქვამს, საქართველოს კინოაკადემიის წევრის, კინორეჟისორის, ბათუმის საავტორო კინოს საერთაშორისო კინოფესტივალის – #BIAFF დამფუძნებლის და დირექტორის, ქართული კინოს სამაგალითო ქომაგის, გიორგი გოგიბერიძის გარდაცვალების გამო…
გიორგი, მრავალი წელი აქტიურად მუშაობდა და დიდი წვლილი აქვს შეტანილი – ქართული საფესტივალო კულტურის განვითარების და კინოს პოპულარიზაციაში. ის ყოველთვის, დიდ ყურადღებას იჩენდა, განსაკუთრებით გულშემატკივრობდა და მხარში ედგა ქართულ კინოს და ქართველ კინემატოგრაფისტებს, რაც ყოველწლიურად აისახებოდა ბათუმის საერთაშორისო კინოფესტივალის პროგრამებში. წლების განმავლობაში, გიორგი იყო საზოგადოებრივი მაუწყებლის აჭარის ტელევიზიაში, გადაცემა – “თეთრი კვადრატის“ ავტორი და წამყვანი, ხელმძღვანელობდა ბათუმის ხელოვნების უნივერსიტეტის, კინო-ტელე ხელოვნების დეპარტამენტს. გადაღებული აქვს მხატვრული და დოკუმენტური ფილმები: „სინაგოგა“, „სტარტი“, „რუსუდან ფეტვიაშვილი“, „ოცი საუკუნის შემდეგ”, “მემენტო მორი“, „წითელი ცხენის ბანაობა“.
საქართველოს კინოაკადემია მადლიერებით მიაგებს პატივს, ჩვენი ძვირფასი მეგობრის, გიორგი გოგიბერიძის ხსოვნას და უსამძიმრებს გიორგის ოჯახს, ახლობლებს, მეგობრებს და კოლეგებს, ამ უდიდეს დანაკარგს…
მშვიდობით, მეგობარო, შეხვედრამდე… დაკრძალვა ბათუმში, სამშაბათს, 31 ოქტომბერს”, – ნათქვამია სამძიმრის ტექსტში.
