მსოფლიოს დიდხანს ვერ დაივიწყებს წყალქვეშა ხომალდის „ტიტანის“ კატასტროფას, რომელსაც 5 ადამიანის სიცოცხლე ემსხვერპლა. მათ შორის იყო პაკისტანელი მილიარდერი შაჰზადა დავუდი შვილთან, 19 წლის სულეიმანთან ერთად. დაღუპული მილიარდერის მეუღლემ ამ ტრაგიკულ მოგზაურობასა და ოჯახის წევრებთან ერთად გატარებულ უკანასკნელ წუთებზე ჟურნალისტებთან ისაუბრა.
კრისტინ დაუდი გერმანიიდანაა, მომავალ მეუღლეს უნივერსიტეტში სწავლისას შეხვდა. 2001 წელს წყვილი დაქორწინდა, ორი შვილი შეეძინათ და ლონდონში დასახლდნენ. კრისტინი ოჯახურ ბიზნესს მართავს, დაკავებულია შემოქმედებითი და საქველმოქმედო საქმიანობით, ასევე ველური ბუნების ფოტოგრაფირებითაა გატაცებული.
დავუდების ოჯახი სრული შემადგენლობით გაემგზავრა ტიტანიკის ექსპედიციის დაწყების ადგილას. კრისტინი და დავუდების 17 წლის ქალიშვილი ალინა 48 წლის შაჰზადას და სულეიმანს აცილებდნენ.
დავუდების ოჯახში ყველანი სამეცნიერო ფანტასტიკით იყვნენ გატაცებული, ამიტომ დიდი ხანია ტიტანიკის ნამსხვრევების დასათვალიერებლად წყალქვეშა ხომალდით მოგზაურობას გეგმავდნენ. თუმცა 4 ათას მეტრ სიღრმეზე მოგზაურობას მხოლოდ მშობლები აპირებდნენ – შაჰზადამ რამდენიმე წლის წინაც დაჯავშნა OceanGate Expeditions-ში ადგილები, თუმცა მაშინ პანდემიამ შეუშალათ ხელი. იდეის განხორციელება წელს გადაწყვიტეს, მაგრამ ამჯერად ექსპედიციაში წასვლის სუვილი 19 წლის სულეიმანმა გამოთქვა. დედა იხსენებს, რომ ბიჭი უბრალოდ „იწვოდა“ ამ სურვილით. ამიტომ თავად უარი თქვა მონაწილეობაზე და ადგილი შვილს „დაუთმო“.
“ჩემი ქმარი და შვილი ორივე ოცნებობდა ტიტანიკის ნახვაზე, სიამოვნებით გავუცვალე ადგილი”, – განუცხადა კრისტინ დაუდმა BBC-ს.
შაჰზადა წლების განმავლობაში შეპყრობილი იყო ჩაძირული ტიტანიკის ისტორიით და, როგორც ჩანს, ეს ინტერესი შვილსაც გადასდო.
კრისტინი ამბობს, რომ მის შვილს სხვა მიზანიც ჰქონდა. სულეიმანმა ექსპედიციაში რუბიკის კუბი წაიღო და სურდა, მსოფლიო რეკორდი დაემყარებინა 3700 მეტრის სიღრმეზე თავსატეხის ამოხსნაში. ის სულ რაღაც 12 წამში აწყობდა კუბს. მანამდე ლეგოს 10000 ნაწილიდან ტიტანიკი ააწყო.
დედის თქმით, მისი შვილი ყოველთვის იყო მიზანდასახული და უნარიანი ადამიანი იყო, ჰქონდა სხვების მიმართ ძლიერი თანაგრძნობის უნარი და ყოველთვის ეხმარებოდა ადამიანებს.
დედა-შვილი გამცილებელი გემის ბორტზე დარჩა, რადგან ხომალდის ზედაპირზე გამოსვლა იმავე დღის საღამოს იგეგმებოდა, მაგრამ საათნახევრის შემდეგ ეკიპაჟთან კომუნიკაცია გაწყდა და ლოდინის მტკივნეული წუთები და საათები დააწყო.
კრისტინი ამბობს, რომ პირველი 10 საათის განმავლობაში ჯერ კიდევ იმედი ჰქონდა, რომ ყველაფერი მშვიდობით დასრულდებოდა. ის და მისი ქალიშვილი ჰორიზონტისკენ იხედებოდნენ და დარწმუნებული იყვნენ, რომ ნავი მალე გამოჩნდებოდა. ელოდნენ და სჯეროდათ, რომ გადარჩენის მრავალი გზა არსებობს. მაგრამ სამძებრო ოპერაციის დაწყებიდან 96 საათის შემდეგ ეს იმედიც გაქრა: ყველაფერი იმაზე მეტყველებდა, რომ წყალქვეშა აპარატში ჟანგბადი ამოიწურა. სწორედ მაშინ გაუგზავნა კრისტინ დავუდმა ახლობლებს მესიჯი, რომ „უკვე ყველაზე უარესისთვის ემზადებოდა“.
კითხვაზე, თუ რა იყო ოჯახის წევრების ბოლო სიტყვები ერთმანეთის მიმართ, მან უპასუხა: „ჩვენ ერთმანეთს ვეხუტებოდით და ვხუმრობდით. შაჰზადა პატარა ბავშვივით აღტაცებული იყო“… სულეიმანი ძალიან ახლოს იყო ჩემთან, ნამდვილი დედას ბიჭი იყო, თუმცა მამა არანაკლებ უყვარდა. მენატრებიან… ძალიან, ძალიან მენატრებიან ორივე“, – ამბობს ტირილით კრისტინი.
წყარო : Mshoblebi.ge
