მომავალი წლის პირველი იანვრიდან საქართველოში 2013 წლამდე მსუბუქი ავტომობილების იმპორტი შეიზღუდება. ამის შესახებ საქართველოს პრემიერ-მინისტრმა მთავრობის სხდომის დაწყებამდე განაცხადა.
ირაკლი ღარიბაშვილის თქმით, 2025 წლის პირველი იანვრიდან კი, ავტობუსებისა და სხვა, 10 წელზე ადრე გამოშვებული სატრანსპორტო საშუალებების აკრძალვა იგეგმება. პრემიერმა მთავრობის სხდომაზე გადაწყვეტილების მიზეზებზე ისაუბრა და აღნიშნა, რომ ქვეყანაში ჰაერის დაბინძურების მაღალი მაჩვენებელია, რაც პირველ რიგში ავტომობილებითაა გამოწვეული.
„ვიმსჯელეთ და მივიღეთ გადაწყვეტილება ქვეყანაში ავტომობილებზე ევრო-5 სტანდარტი შემოვიღოთ. პრაქტიკაში ეს ნიშნავს იმას, რომ ქვეყანაში 2013 წლამდე გამოშვებული ავტომობილების იმპორტი შეიზღუდება. ჩვენი გადაწყვეტილებაა, რომ რეგულაცია მსუბუქი ავტომობილებისთვის ძალაში შევა 2024 წლის 1-ლი იანვრიდან, ხოლო ავტობუსების და სატვირთო ავტომობილებისთვის 2025 წლის პირველი იანვრიდან. ამაზე ჯერ კიდევ ვმსჯელობთ“, – განაცხადა პრემიერმა.
