გაზეთში “კვირის პალიტრა” გამოქვეყნებულია ექსკლუზიური ინტერვიუ ყველაზე პოპულარული ქართველი ფეხბურთელის, ხვიჩა კვარაცხელიას მამასთან, ბადრი კვარაცხელიასთან, რომელსაც ჟურნალისტი რატი შელეგია ბათუმში შეხვდა და საკმაოდ ვრცელი ინტერვიუც ჩაწერა. მათ არაერთ საინტერესო თემაზე ისაუბრეს, მათ შორის – ეროვნულ ნაკრებზე, ხვიჩას საფეხბურთო მომავალზე, ნეაპოლზე და ა.შ.
– ხვიჩას საცოლეზეც გკითხავთ: ნიცა ისედაც სულ ხვიჩას გვერდით იყო, რამდენიმე კვირის წინ კი ყველა მათ ნიშნობაზე ალაპარაკდა. ზოგიერთმა ისიც დაწერა, რატომ ჩქარობს ხვიჩა დაოჯახებას, ჯობს, ამ ეტაპზე მთელი ყურადღება საფეხბურთო კარიერას დაუთმოსო…
– ჯერ მხოლოდ დაინიშნნენ, მაგრამ როცა ოფიციალურად იქნებიან დაქორწინებულები, მეუღლე ან მაშინ რატომ შეუშლის ხელს საფეხბურთო კარიერაში?! პირიქით… ვარჯიშიდან ხვიჩა ისედაც სახლში მოდიოდა, მაგრამ უკეთესი არ იქნება, თავისი გულის სწორი გვერდით ჰყავდეს? დროს თუ გამონახავდნენ, აქამდეც ერთად მიდიოდნენ და მომავალშიც ასე იქნება.
