საქართველოს პრემიერ-მინისტრი ირაკლი ღარიბაშვილი ნოდარ ნათაძის გარდაცვალების გამო მწუხარებას გამოთქვამს.
„მწუხარებას გამოვთქვამ ქართველი ენათმეცნიერის, პოლიტიკური და საზოგადო მოღვაწის ნოდარ ნათაძის გარდაცვალების გამო.
მან თავისი განსაკუთრებული კვალი დატოვა დამოუკიდებელი საქართველოს სახელმწიფოებრივი აღმშენებლობის გზაზე და საქართველოს დამოუკიდებლობის აღდგენის აქტზე საკუთარი ხელმოწერით მნიშვნელოვანი პირადი წვლილი შეიტანა ამ დიდ საქმეში.
ნოდარ ნათაძე იყო ადამიანი, რომელიც სიცოცხლის ბოლომდე დარჩა საკუთარი პრინციპების ერთგული, რითაც მრავალი თაობისთვის მაგალითის მიმცემი იქნება.
თანავუგრძნობ მის ოჯახსა და ახლობლებს“, – წერს პრემიერი.
დედაქალაქის მერი, კახა კალაძე ნოდარ ნათაძის გარდაცვალების გამო მწუხარებას გამოთქვამს.
„ვწუხვარ ცნობილი ქართველი პოლიტიკოსის, პუბლიცისტის, ენათმეცნიერის, ნოდარ ნათაძის გარდაცვალების გამო. ნოდარ ნათაძე იყო ეროვნული მოძრაობის ერთ-ერთი გამორჩეული ლიდერი, “სახალხო ფრონტის” დამფუძნებელი, საქართველოს რესპუბლიკის პირველი მოწვევის უზენაესი საბჭოს წევრი, საქართველოს დამოუკიდებლობის აღდგენის აქტზე ერთ-ერთი ხელისმომწერი. იგი იყო პოლიტიკოსი, რომელიც აქტიურად მონაწილეობდა ჩვენი ქვეყნისთვის მნიშვნელოვან და გადამწყვეტ პროცესებში. ვიზიარებ ნოდარ ნათაძის ოჯახის წევრების, მისი ახლობლების გულისტკივილს”, – აღნიშნულია კახა კალაძის სამძიმრის ტექსტში.
