საჯარო უწყებებმა “ღამის შოუს” ბენდს 2022 წელს 128 500 ლარი უტენდეროდ მისცეს – ამის შესახებ ინფორმაციას “ფლანგვის დეტექტორი” ავრცელებს.
“2022 წლის მონაცემებით ღამის შოუს ბენდთან სხვადასხვა სახელმწიფო უწყებებმა ჯამში 128,500 ლარის გამარტივებული შესყიდვა გააფორმეს, რაც ნიშნავს, რომ აღნიშნულმა უწყებებმა ექსკლუზიურად ამ ბენდთან გადაწყვიტა ხელშეკრულების გაფორმება ნაცვლად ტენდერის გამოცხადებისა.
ღამის შოუს ბენდი ცალკე იურიდიული ფორმით არ არსებობს, ამიტომაც საჯარო უწყებები მათ თანხას სხვადასხვა კერძო პირთან ხელშეკრულების გაფორმების გზით აძლევენ, მაგალითად ასეთ კერძო პირებს წარმოადგენს: გიორგი გაბუნია, ჯიმო აბესაძე, ზვიად ბლიაძე და გელა გნოლიძე.
ღამის შოუს ბენდთან ხელშეკრულებებს ადგილობრივი თვითმმართველობები აფორმებენ. ხელშეკრულებები ყოველგვარი კონკურენციის გარეშე, პირდაპირი შესყიდვის წესით ფორმდება. 2022 წლის განმავლობაში შესყიდვების სააგენტოს ჯამში შვიდმა მერიამ მიმართა, რათა გამარტივებული წესით ხელშეკრულების გასაფორმებლად ნებართვა მიეღო.
ყველაზე ძვირად ღირებული ხელშეკრულება ღამის შოუს ბენდთან ფოთის, წყალტუბოსა და სენაკის მერიებმა გააფორმეს.
ფოთის მერიას 24-25 ივლისს ჰქონდა კონცერტის ჩატარება დაგეგმილი. ხოლო ექსკლუზიურად ღამის შოუს ბენდთან ხელშეკრულების გაფორმება შემდეგი მოტივით დაასაბუთეს – “გიორგი გაბუნიას ღამის შოუ როგორც ახალგაზრდებში ასევე ფართო საზოგადოებაში სარგებლობს მაღალი სატელევიზიო რეიტინგით, დიდი სიყვარულითა და პოპულარობით.”
რაც შეეხება წყალტუბოს მუნიციპალიტეტს, ზაფხულის ტურისტული სეზონის ოფიციალურ გახსნასთან დაკავშირებით მუნიციპალიტეტმა ახალგაზრდული ღონისძიებების ფარგლებში გადაწყვიტა ღამის შოუსთან ხელშეკრულების გაფორმება. ხელშეკრულების ღირებულებამ 22,000 ლარი შეადგინა. დასაბუთებაში აქაც მითითებულია: “გიორგი გაბუნიას ღამის შოუ ახალგაზრდებში სარგებლობს განსაკუთრებული პოპულარობითა და მაღალი სატელევიზიო რეიტინგით. სწორედ ახალგაზრდების მოთხოვნის გათვალისწინებით მოხდა მასზე არჩევანის შეჩერება და მუნიციპალიტეტის გადაწყვეტილებით აღნიშნულ საზეიმო ღონისძიებაში მონაწილეობას მიიღებს გიორგი გაბუნია და “ღამის შოუს ბენდი”.
ღამის შოუსთვის გადამხდელ მუნიციპალიტეტებში მესამე ადგილს სენაკის მერია იკავებს, რომელიც 19,000 ლარის გადახდას აპირებს ბენდის დასაქირავებლად. სენაკის მერიას 11 აგვისტოს აქვს დაგეგმილი გასართობი ღონისძიების ჩატარება. ღამის შოუსთან ხელშეკრულების გაფორმების დასაბუთებაში სენაკსაც იგივე უწერია: “გიორგი გაბუნიას ღამის შოუ როგორც ახალგაზრდებში ასევე ყველა თაობის წარმომადგენლებში დიდი სიყვარულითა და პოპულარობით სარგებლობს.”- წერია ფლანგვის დეტექტორის მიერ მოკვლეულ ინფორმაციაში.
აღნიშნულს ბენდის წევრი თათა გიორგობიანი გამოეხმაურა :
“ძალიან გთხოვთ, კარგად დაითვალეთ ერთი წლის განმავლობაში რამდენი კილო საკვები მივიღე ან რამდენი კილოგრამი მაკიაჟი წავისვი, დაიანგარიშეთ გაურკვეველი დეტექტორებით, მერე შეკრიბეთ და სტატია მაგაზეც დამიწერეთ 
“
